ព្រះសីហនុ៖ នាយករដ្ឋមន្ត្រីកម្ពុជាសម្ដេចធិបតី ហ៊ុន ម៉ាណែត បានលើកឡើងពីផលប៉ះពាល់នៃការវាយប្រហាររបស់ អាមេរិក និងអង់គ្លេសលើក្រុមឧទ្ទាមហ៊ូទី នៅទឹកដីយេម៉ែន ដល់ការដឹកជញ្ជូនតាមផ្លូវសមុទ្ររបស់កម្ពុជា។

ការប៉ះពាល់នេះ ធ្វើឲ្យតម្លៃនៃការដឹកជញ្ជូនមានការកើនឡើង ដែលសម្ដេចថាត្រូវមានវិធានការគន្លឹះដើម្បីជួយផងដែរ។

សម្ដេចធិបតីលើកឡើងបែបនេះក្នុងពិធីប្រកាសអនុវត្តន៍កម្មវិធីពិសេសជំរុញការវិនិយោគខេត្តព្រះសីហនុថ្ងៃព្រហស្បតិ៍ ទី៣១ ខែមករា ឆ្នាំ២០២៤នេះ នៅខេត្តព្រះសីហនុ។

យោងតាមការចុះផ្សាយរបស់វិទ្យុបារាំងអន្តរជាតិ យន្តហោះចម្បាំងអាមេរិក និងអង់គ្លេសបានចេញទៅទម្លាក់គ្រាប់លើទីតាំងយោធាសំខាន់ៗរបស់ក្រុមហ៊ូទី នៅរដ្ឋធានីសាណា ទីក្រុងកំពង់ផែ ហូដេដា និងទីក្រុងមួយចំនួនទៀត ដែលស្ថិតក្រោមការគ្រប់គ្រងរបស់ពួកឧទ្ទាមហ៊ូទី តាំងយប់ថ្ងៃទី១២ មករា ដោយប្រធានាធិបតីអាមេរិកបានលើកឡើងថាប្រតិបត្តិការយោធានៅយេម៉ែន គឺដើម្បីស្តារសន្តិសុខចរាចរណ៍នៅសមុទ្រក្រហម ប៉ុន្តែ អ៊ីរ៉ង់ដែលជាអ្នកគាំទ្ររដ្ឋាភិបាលយោធាហ៊ូទី ថ្កោលទោស រិះគន់អាមេរិក និងអង់គ្លេសថា កំពុងរំលោភដែនអធិបតេយ្យភាពរបស់យេម៉ែន៕